N1 x Flöff

Hvað verður um vinnufatnað þegar hann hefur lokið sínu hlutverki?

Í samstarfi Flöff og N1 fékk gamall starfsmannafatnaður tækifæri til að halda áfram ferðalaginu, í allt öðru formi.

Textíll úr notuðum vinnufatnaði N1, sem annars hefði þurft að farga, var tekinn til hliðar og unninn af Flöff í nýtt efni. Úr því varð áklæði á sérhannaðan bekk fyrir þjónustustöð N1. Fatnaður sem áður tilheyrði daglegu lífi starfsfólks á stöðvunum varð þannig að hluta af rýminu sjálfu.

Verkefnið sýnir á einfaldan og áþreifanlegan hátt hvernig hægt er að líta á textíl sem auðlind frekar en úrgang. Í stað þess að saga efnisins endi þegar flíkin er tekin úr notkun fær það nýtt hlutverk, nýtt form og lengra líf.

Bekkurinn var frumsýndur á HönnunarMars 2026 á N1-stöðinni við Hringbraut í Reykjavík, á stað þar sem nýja hlutverk efnisins tengist aftur uppruna þess.